Rekorido miembronan di Parlamento na e Proyekto Parke Mangrove.

Djárason mainta dia 26 di mei 2021 Presidente di Parlamento señora Charetti America-Francisca i miembronan di Parlamento sr. Michelangelo Martines, sr. Fergino Brownbill, sra. Maria Nita, sr. Gwendell Mercelina Jr., sra. Ana-Maria Pauletta, sr. Steven Croes, sr. Quincy Girigorie i sr. Steven Martina a hasi un bishita di trabou den forma di un rekorido na e proyekto di Palu di Mangelnan (Mangrove ) na RIF.

E proyekto ekológiko aki ta kai bou di e Ministerio di Tráfiko, Transporte i Planifikashon Urbano. Minister sra. Zita Jesus-Leito e titular demishonario dje Ministerio ariba menshoná i e tim di proyekto a duna e Parlamentarionan un splikashon amplio di e trabounan ku a tuma lugá i e fase aktual dje desaroyonan ku e proyekto su konstrukshon i urbanisashon ta den. E área di RIF den futuro ta bai bira un parke ekológiko kaminda e bunitesa di nos naturalesa Marino, kultura i historia ta un atrakshon turístiko úniko adishonal pa e área di Otrobanda.