Inisio di e aña legislativo 2021-2022

Djamars dia 14 di sèptèmber 2021 tabata e di dos djamars di e di nuebe luna ku tradishonalmente ta e dia ku e Parlamentonan di Kòrsou, Aruba i Sint Maarten ta kuminsá nan aña Parlamentario nobo, den e kaso aki e aña legislativo 2021-2022. Parlamento di Kòrsou mester a hasi hopi adaptashon pa motibu ku nos pais ta den un pandemia i tin hopi regla i protokòl pa atené nan mes na dje. Esei no a kita ku djamars 14 sèptèmber 2021 na Kòrsou a sa di selebrá un aspekto di nos demokrasia Parlamentario hopi importante. Marina Real, VKC, Kuerpo di Polis i otro servisionan i órganonan di estado a sa di koperá i duna tur di nan parti pa pueblo su representantenan por a kumpli ku e tradishon i proseduranan pa efektuá un inisio di e aña legislativo 2021-2022 eksitoso. Den e sala di reunion plenario di Parlamento den Stadhuis na Alameda (wilhelminaplein), su ekselensia Gobernador di Kòrsou señora Lucille Greorge Wout kompaña pa su esposo i su ayudante di Marina Real a lesa e diskurso di órden ku a duna un i tur un bista ta kiko lo ta e puntanan di lansa pa e temporada nobo pa ku e plannan di e Konseho di Minister. Despues di e Reunion Solèm e Minister di Finansa na nòmber di e Gabinete aktual a hasi e entrega ofishal di e Presupuesto di pais na Presidente di Parlamento señora Charetti America-Francisca. E próksimo dianan aki Parlamento lo bai hiba vários deliberashon ekstensivo riba e presupuesto aki. Riba e potrètnan por haña un impreshon di e evento!