Bishita Sekretario di Estado sr. Raymond Knops
Awe, djaluna 2 di novèmber 2020, e fecha riba kual Gobièrnu di Kòrsou i Hulanda a firma un akuerdo polítiko riba un kooperashon di vários aña, Sekretario di Estado, sr. Raymond Knops a hasi un bishita di kortesia na Parlamento di Kòrsou.
Sr. Knops, kompañá pa e representante di Hulanda na Willemstad, sr. Erwin Arkenbout, a papia na Parlamento, ku Presidente di Parlamento, sra. Ana-Maria Pauletta i tres lider di e frakshonnan mas grandi ku ta sr. Stephen Walroud, sr. Gilmar Pisas i sra. Elsa Rozendal. Den e enkuentro aki sr. Knops a aklará vários punto tantu riba e akuerdo ku a firma i tambe e trayekto ku lo kana pa un Lei di Reino di konsenso, e asina yama "consensus rijkswet" den kual lo mester lanta un entidat ku te ainda ta karga e nòmber COHO (Organo Karibense di Reforma i Desaroyo). Ta e intenshon pa den e próksimo añanan hasi invershonnan kuantioso den e ekonomia di Kòrsou kualnan lo ta kompañá pa reformanan nesesario pa garantisá ku ekonomia di Kòrsou por bolbe krese.
Durashon di e krísis kousá pa e pandemia di COVID-19 no por wòrdu pronostiká na e alturanan aki. Pero, tanten ku e efektonan ei ta dura, Kòrsou lo por konta ku sosten finansiero pa por kumpli ku su obligashonnan. Entre otro Hulanda ta pone un total di 30 mion euro pa invershon den enseñansa. Finalmente e intenshon ta pa e invershonnan aki bira notabel pa e pueblo, den sentido ku lo mester krea kuponan di trabou, eradiká pobresa, mehorá enseñansa ets.
E kombersashon na Parlamento a kana den un esfera ameno i e partisipantenan a keda satisfecho ku e kontestanan ku nan a risibí riba nan preguntanan.
