Bishita di hóbennan ku a gana kòntèst di debate
Djabièrnè, 4 di desèmber 2020 Presidente di Parlamento, sra. Ana Maria Pauletta a risibí sinku hóben ku a forma parti di e kòntèst di debate “Mijn nieuwe wereld” den luna di novèmber último.
Den luna di novèmber último, pa mas eksakto riba dia Internashonal di Derechi di Mucha tabata tin un debate entre Aruba, Bonaire i Kòrsou ku a kai bou di e trayekto di UNICEF, yama: Mijn nieuwe wereld. Despues di e debate aki a kompilá resultadonan di e diskushon, e enkuesta i e puntonan di mas importante di e debate den un rapòrt ku título: “Mijn nieuwe wereld”.
Durante e enkuentro ku Presidente di Parlamento e hóbennan a haña oportunidat pa trese e puntonan dilanti ku mas a resaltá durante e debatenan i ku ta biba bou di nos hubentut. Puntonan ku a keda tres’é ta por ehèmpel falta di mas atenshon pa e hóbennan, desempleo bou di hubentut, aktividatnan den tempu liber i e impakto a konsekuensia di COVID-19. Tambe nan a enfatisá ku tin hopi nesesidat di instansianan i/òf personanan kaminda ku nan por papia i desahogá nan mes. E parti di salú mental ta di sumo importansia.
Na final di e enkuentro, e grupo di hóben ku a gana e debate nashonal, a hasi entrega di e rapòrt na Presidente di Parlamento i a palabrá ku e rapòrt lo keda mandá pa tur miembro di Parlamento tuma nota di dje.
